Tēnā tātou katoa,
Tini whetū ki te raki, mau tonu, mau tonu. Whatu karokaro ai te tākata, karo noa, karo noa, ka oti atu. Nei te mihi ki a rātou kā manu pirau a Tāne, kātahi anō ka riro i te rika kaha o aituā, nō reira koutou rā, moe mai rā, okioki mai rā. Ko kā rau o Tūpōuri, ko karo, ko karakahia e Tahu Kumea, ko karakahia e Tahu Whakairo, e kā mātaka o te mahi tītī, e kā kaiwhakatere o te moana, hoea, hoea te waka. Ka tāhuri te ihu o tōku waka ki a tātou kā konohi o rātou, tātou kua pae mai nei i te taiao, tēnā koutou i ruka anō i ō koutou āhuataka maha.
Kua irika kā tuna i kā whata, kua pae kā kūmara ki te rua, kua tahuri ki te whakatikatika i kā whare mō te hōtoke. Kua huri te tae o te hua karaka, kua maoa kā kākano o kā rākau o te kaherehere, kua mōmona hoki kā manu. Ka huri ōna tākata mōhio o te iwi ki kā rāwekeweke me kā tāhere mō te patu manu. Mauri ora ki a tātou.